იაპონიის ერთ-ერთმა წამყვანმა ავტომობილების მწარმოებელმა კომპანია „ტოიოტა მოტორ კორპორეიშენმა“ განაცხადა, რომ აპირებს 500 მილიონი დოლარის ინვესტირებას კომპანია „ჯობი ავიაციაში“, რომელიც კომერციული სამგზავრო გადაზიდვებისთვის საჰაერო ტაქსების შემუშავებას ახორციელებს .
ეს ინვესტიცია მიზნად ისახავს Joby ელექტრო საჰაერო ტაქსის სერტიფიცირებისა და კომერციული წარმოების დაწყების მხარდაჭერას.
ოფიციალური განცხადების თანახმად, დაფინანსება ორ თანაბარ ტრანშად გადანაწილდება, რომლებიც 2024 და 2025 წლების ბოლოსთვისაა დაგეგმილი. ინვესტიციების ამ რაუნდის დასრულების შემდეგ, Toyota-ს Joby Aviation-ში მთლიანი ინვესტიცია 894 მილიონ დოლარს მიაღწევს. კომპანიები შვიდი წელია თანამშრომლობენ და საჰაერო ტაქსის კომერციალიზაციის პირველი ფაზისთვის საწარმოო ალიანსის შექმნას გეგმავენ.
2024 წლის თებერვალში, Khaleej Times-მა გაავრცელა ინფორმაცია, რომ Joby Aviation-მა ხელი მოაწერა შეთანხმებას დუბაის გზებისა და ტრანსპორტის სამსახურთან (RDTA), რომლის მიხედვითაც ქალაქში საჰაერო მიმოსვლა ორი წლის განმავლობაში დაიწყება. საჰაერო ტაქსების სიჩქარე, სავარაუდოდ, 320 კმ/სთ-მდე გაიზრდება, რაც ურბანული მობილობის მნიშვნელოვან წინსვლას წარმოადგენს.
ასევე აღსანიშნავია, რომ Joby Aviation-მა ადრე ჩაატარა ერთობლივი ექსპერიმენტები აშშ-ის აერონავტიკისა და კოსმოსური სივრცის ეროვნულ ადმინისტრაციასთან. ამ ტესტებმა აჩვენა, რომ დაახლოებით 500 მეტრის სიმაღლეზე საჰაერო ტაქსების ხმაურის დონე უფრო დაბალი იყო, ვიდრე ჩვეულებრივი საუბრის დონე, რაც საჰაერო ტაქსების ურბანულ ტრანსპორტში ინტეგრაციის ახალ შესაძლებლობებს ხსნიდა.
