Қытай өткен айдың басында қатаң карантиннен шыққан Шанхай мегаполисінде коронавирустың омикрон мутациясының жаңа субварианты табылғанын жариялады. Reuters агенттігінің хабарлауынша, жаңа омикрон субварианты BA 5.2.1 деп аталды.
Маусым айының басында Шанхай әлемдегі ең қатаң карантиндік шаралардың бірін алып тастады. Көптеген тұрғындарға пәтерлерінен шығуға тыйым салынды. Дегенмен, инфекция жұқтырғандар саны артып келеді..
«Біздің қаламызда соңғы кездері COVID-19 жұқтырғандар саны артып келеді. Эпидемияның қоғамда таралу қаупі өте жоғары болып қала береді», - деп ескертті Шанхай қалалық денсаулық сақтау комиссиясының директорының орынбасары Чжао Дандан.
Оның айтуынша, Шанхайдағы бірнеше маңызды аудандардың тұрғындары 12-14 шілде аралығында COVID-19 тестілеуінің екі кезеңінен өтеді. Бұл жаңа індеттің пайда болу мүмкіндігін бақылауға көмектеседі.
Қытайдың Аурулардың алдын алу және бақылау орталығының мәліметі бойынша, COVID-19 жаңа толқынының негізгі себебі болып табылатын омикрон BA 5.2.1 субварианты алғаш рет Қытайда Угандадан Шанхайға келген 37 жастағы ер адамда анықталды.
Зерттеулер жаңа субварианттың берілу жылдамдығы жоғары екенін және иммундық антиденелерге төзімдірек екенін көрсетті. Дегенмен, вакцинация BA.5-тен болатын ауыр асқынулардың немесе өлімнің алдын алуда тиімді болып қала береді.
