Қытай армиясы Тайвань маңындағы жаттығулар кезінде алғаш рет алыс қашықтыққа атылатын артиллерияны қолданады. Қытай күштері тіпті DF-17 (Dongfeng-17) гипердыбыстық зымыранын орналастырады.
Бұл туралы қытайлық Global Times басылымы хабарлады. Кейбір жаттығу аймақтарына алғаш рет Тайваньнан 20 шақырым қашықтықтағы аумақтар кіреді. Журналистер атап өткендей, Халық-азаттық армиясы аралды толығымен қоршап, оған бақылау орната алады.
Газетте жаттығуларда қолданылатын қару-жарақ пен жабдықтардың тізімі берілген, оның ішінде J-20 жасырын жойғыш ұшағы, H-6K бомбалаушы ұшағы, J-11 жойғыш ұшағы, 052D типті эсминец, 056A типті корвет және DF-11 қысқа қашықтыққа ұшатын баллистикалық зымыран бар. Сондай-ақ ерте ескерту ұшағы және DF-17 гипердыбыстық зымырандары да қатысады.
«Зымырандар аралдың үстінен ұшады, бұл бұрын-соңды болмаған жағдай», - деп түсініктеме берді қытайлық әскери сарапшы Чжан Сюэфэн. Оның айтуынша, жаттығулар қытайлық әскерилердің аралды қоршауға алып, Тайвань мәселесін «бейбіт емес жолмен» шешуге қабілетті екенін көрсетеді.
Өз кезегінде қытайлық әскери сарапшы Сун Чжунпин «біздің шайқас жоспарымыз АҚШ пен Тайвань билігіне жеткізілгенін» атап өтті. Ол «болашақта әскери қақтығыс болған жағдайда, қазіргі уақытта дайындалып жатқан операциялық жоспарлар тікелей шайқаста жүзеге асырылуы мүмкін» деп мәлімдеді.
