Reuters агенттігінің хабарлауынша , Тайланд пен Камбоджа арасындағы шекарадағы қақтығыс тағы да ашық соғыс қимылдарына ұласты. Екі тарап қатарынан екінші күн артиллерия, зымыран және әуе шабуылдарымен алмасты. Қақтығыс салдарынан кем дегенде 16 адам қаза тауып, ондаған мың бейбіт тұрғын үйлерін тастап кетуге мәжбүр болды.
24 шілде таңертең дипломатиялық даудан кейін шиеленіс күшейе түсті: Таиланд Пномпеньдегі елшісін шақырып алып, камбоджа дипломатын елден қуып жіберді. Оқиға тай сарбазының қатысуымен болған мина жарылысынан туындады. Бангкок жарылғыш құрылғыны камбоджа күштері орнатқанын мәлімдеді. Пномпень айыптауларды жоққа шығарды.
Жұма күні қақтығыс жаңа шарықтау шегіне жетті: Таиланд Камбоджаны бейбіт тұрғындарға шабуыл жасады деп айыптады, ал Камбоджа өз кезегінде Таиландты кассеталық оқ-дәрілерді қолданды деп айыптады. Екі тарап та жағдайдың ушығуы үшін жауапкершілікті бір-біріне аударуды жалғастыруда.
Таиландтың Қоғамдық денсаулық сақтау министрлігінің мәліметі бойынша, қазірдің өзінде 130 000-нан астам адам эвакуацияланған. Қақтығыс аймағында он бес бейбіт тұрғын мен бір сарбаз қаза тапты. Қырық алты адам, оның ішінде 15 сарбаз жарақат алды.
Үшінші елдердің делдалдыққа тырысуына қарамастан, Таиланд кез келген сыртқы араласудан бас тартты. Бангкок қақтығысты тек екіжақты келіссөздер арқылы шешуді талап етеді.
Тарихи тұрғыдан алғанда, шекара дауы ғасырлар бойы жалғасып келеді. Екі мемлекет арасындағы аумақтар ортағасырлық кхмер және тай патшалықтарынан бері қолдан-қолға ауысып келеді. Соңғы 70 жылда Тайланд пен Камбоджа әртүрлі қарқындылықтағы 10-нан астам қарулы қақтығысты бастан кешірді. Бұл соңғы соғыс осы қанды тарихтың жалғасы болып табылады.
