Еуропалық Одақ Украинада жасалған Ресей қылмыстарының дәлелдерін жинау үшін үйлестіру орталығын құрады. Орталық Гаагада орналасады. Бұл туралы Еуропалық Комиссияның президенті Урсула фон дер Ляйен мәлімдеді, деп хабарлайды РБК-Украина.
«Украина мен ЕО прокурорлары қазірдің өзінде бірлесіп жұмыс істеп, дәлелдемелер жинап жатыр. Мен Гаагада [Украинада жасалған] қылмыстарды тергеу жөніндегі халықаралық орталық құрылатынын хабарлауға қуаныштымын. Ол дәлелдемелер жинауды үйлестіреді», - деп мәлімдеді фон дер Лейен.
Ол Еуропалық Одақ орталықты жақын арада іске қосатынын және ол Украинамен, оның серіктестерімен және Нидерландымен үйлестіре жұмыс істейтінін атап өтті.
Естеріңізге сала кетейік, бұған дейін Еуропалық Парламент Украинаға қарсы агрессия қылмысын қудалау үшін арнайы трибунал құру туралы қарар қабылдаған болатын.
Еуропалық Парламенттің қарарында Еуропалық Одақ пен оның мүше мемлекеттері Ресейдің саяси және әскери басшылығы жасаған Украинаға қарсы агрессия қылмысын соттау үшін арнайы халықаралық трибунал құруға ұмтылуы керек делінген.
Еуропалық Парламенттің шешімі бойынша, Екінші дүниежүзілік соғыстан кейінгі нацистік көшбасшылар сотталған Нюрнберг процесіне ұқсас арнайы трибунал Украинамен және халықаралық қауымдастықпен тығыз ынтымақтастықта, мүмкіндігінше БҰҰ арқылы құрылуы керек. Бұрынғы Югославия мен Руандадағы соғыс қылмыстары үшін кінәлілерді қылмыстық жауапкершілікке тарту үшін БҰҰ Қауіпсіздік Кеңесінің шешімімен осындай трибуналдар құрылды.
Дереккөзді оқыңыз