Қызға Ресей Қарулы Күштерінің «абыройын түсірді» деген айыппен хаттама жасалды.
Дағыстан Республикасындағы (Ресей Федерациясының құрамына кіретін) мектепте түлектер бірі соңғы қоңырау кезінде Украинаға бостандық талап етіп, Ресей президенті Владимир Путинді «шайтан» деп атады. Көп ұзамай ол және оның анасы бұл әрекеті үшін кешірім сұрауға мәжбүр болды.
Аймақтық Telegram арналарының хабарлауынша, қызға Ресей Қарулы Күштерінің «абыройын түсірді» деген айып тағылған.
Сондай-ақ, кәмелетке толмағандарды тәрбиелеудегі міндеттерін орындамағаны үшін ата-анасына қатысты хаттама жасалды.
Видеоларда қыз «тек өзіне назар аудартқысы келгенін» айтып, өкініш білдіреді. Зухраның анасы камера алдында билік пен Владимир Путиннің әрекеттерін қолдайтынын, Украинадағы «арнайы операцияны» қолдайтынын және өзін патриот деп атайтынын айтады. Екеуі де қорқып, жаттыққан сөздермен сөйлейді.
