Польша Оңтүстік Кореядан K2 Black Panther танкілері мен FA-50 ұшақтарын сатып алмақшы. Армияның жаңғыртылуы ішінара Ресейден келетін қауіптермен байланысты.
Бұл туралы қорғаныс министрі Мариуш Блашчак мәлімдеді, деп хабарлайды wPolityce. Басылымның мәліметінше, елдер арасындағы келісім келесі жылы күшіне енеді.
Польша 120 мм зеңбірекпен жабдықталған және сағатына 75 км жылдамдыққа дейін жете алатын 180 кореялық K2 Black Panther танкін алады деп күтілуде. Сондай-ақ, Korea Aerospace Industries компаниясының Lockheed Martin компаниясымен бірлесіп T-50 Golden Eagle ұшағы негізінде жасаған 48 FA-50 жеңіл шабуылдаушы ұшағы туралы да айтылуда.
«Біз үш эскадрилья сатып алуға мүдделіміз. Алғашқы бөлімшелер келесі жылы Польшаға жеткізіледі. Біз бұл мәселе бойынша келіссөздерді аяқтап жатырмыз. Жалпы алғанда, бұл біздің армиямыздың жауынгерлік дайындығындағы серпіліс болады», - деп атап өтті қорғаныс министрі.
Кореялық жауынгерлік көліктер Польшаға 2,3 миллиард долларға түседі. Ұшақтардың құны 2,6 миллиард долларды құрайды. Келісімшартқа сондай-ақ 670 AS21 Redback брондалған машинасы, K9 өздігінен жүретін гаубицалары және KM-SAM Block 2 әуе қорғаныс жүйелері кіреді.
Естеріңізге сала кетейік, Ақ үй бұған дейін Украинаға 300 шақырымдық HIMARS көп атылатын зымыран жүйесі үшін ATACMS зымырандарын бермейтінін мәлімдеген болатын. Америкалық шенеуніктер мұндай қадам жаһандық соғысқа әкеледі деп қорқады.
