Ресейлік ұшақтар Сириядағы оппозиция бақылауындағы Идлиб провинциясын бомбалады, деп хабарлады жексенбі, 2 қаңтарда Reuters агенттігі куәгерлерге сілтеме жасай отырып.
Reuters агенттігінің хабарлауынша, биік ұшатын әскери ұшақтар бірнеше қалаға және қазіргі уақытта шамамен миллион адам тұратын Идлибке су жеткізетін су мұнарасына бомба тастаған. Ресей де, Сирия да шенеуніктері әуе шабуылы туралы хабарламаларға қатысты ешқандай пікір білдірген жоқ. Әзірге құрбан болғандар туралы ақпарат жоқ.
Идлиб қалалық су шаруашылығы басқармасының өкілі бомбалау салдарынан сумен жабдықтау үзілгенін хабарлады. Куәгерлердің айтуынша, Түркиямен шекаралас Баб әл-Хава шекара өткелінің маңындағы мал және құс фермалары да зақымдалған. «Орыстар инфрақұрылым мен коммерциялық нысандарды нысанаға алып отыр. Бұл халықтың азабын ушықтырып жатыр», - деді басқарманың өкілі Абу Хазем Идлиби.
10 жылдан астам уақыт бойы соғыс
БҰҰ мәліметтері бойынша, 2011 жылы басталған Сириядағы азаматтық соғыс салдарынан кем дегенде 350 000 адам қаза тапқан. Соғысқа белсенді қатысқанына қарамастан, Ресей сириялық босқындарды қабылдаудан бас тартады. 2020 жылы Ресейде тек екі сириялыққа баспана берілді, ал шамамен 400 сириялық азамат уақытша әскери баспана алды. Сонымен қатар, Германия 800 000-нан астам сириялық босқынды қабылдады.
