Сейсенбі, 21 наурызда Литва Сеймі Ресей азаматтары мен олардың бақылауындағы компанияларға Литвада жылжымайтын мүлік сатып алуға тыйым салуды қолдады.
Мұндай тыйым Ресейдің Украинадағы агрессиясына жауап ретіндегі шектеу шаралары туралы заң жобасына енгізілген.
Парламент заң жобасын екінші оқылымда 113 дауыспен қолдап қабылдады, ешкім қарсы дауыс бермеді, ал тоғыз депутат қалыс қалды.
Ол әлі үшінші оқылымда қабылданған жоқ.
Тыйым Литвада уақытша тұруға рұқсат алған Ресей азаматтарына қолданылмайды, себебі олар қудалау қаупіне байланысты Ресейге орала алмайды.
Заң жобасында сондай-ақ Ресей мен Беларусьпен байланыс орнатып жатқан литвалық саясаткерлер мен олармен байланысты тұлғаларға тиесілі компаниялардың атауларын жариялау туралы ереже де бар.
Заң бір жыл бойы, 2024 жылдың 14 сәуіріне дейін күшінде болады деп күтілуде.
