21 шілдеде Ресей президенті Владимир Путин Қауіпсіздік Кеңесінің мүшелерімен кездесуінде Польша Украина аумағын басып алуды жоспарлап отырғанын және Беларусь жерлеріне «көз тігіп» отырғанын мәлімдеді.
«Польша басшыларына келетін болсақ, олар НАТО қолшатырының астында қандай да бір коалиция құрып, Украинадағы қақтығысқа тікелей араласып, өздері үшін үлкенірек бөлікті «жұлып алуды», өздерінің тарихи аумақтары деп санайтын бүгінгі Батыс Украинаны қайтарып алуды үміттеніп отырған шығар», - деді Путин.
Ресей президенті өз сөздерін растайтын ешқандай ақпарат берген жоқ.
«Бүгінгі Польшаның батыс аумақтары Сталиннің поляктарға сыйы болды. Варшавадағы достарымыз мұны ұмытып кетті ме? Біз оларға еске саламыз», - деп қосты Ресей президенті.
Путин бұған дейін Қырымды аннексиялау және Украинаға басып кіруді ақтау үшін Кеңес өкіметінің аумақтық «сыйлықтары» туралы мәлімдемелерді пайдаланған.
Варшава Ресей президентінің мәлімдемелеріне қатысты әзірге түсініктеме берген жоқ.
