КСРО Қорғаныс министрінің бұрынғы орынбасары, 84 жастағы Владимир Шуралев Мәскеуде жол апатынан қайтыс болды. Бұл туралы бүгін, 2 наурызда Ресей Федерациясының Әскери командирлер клубының басшысы Николай Дерябин хабарлады.
Оның айтуынша, Владимир Шуралевті «1 наурыз күні кешке көшеде көлік қағып кеткен».
«Ол Склифосовский атындағы ғылыми-зерттеу институтына жеткізілді, онда ол 2 наурызда таңғы сағат 7:00-де өмірмен үйлеспейтін жарақаттардан қайтыс болды», - деп түсіндірді Дерябин.
Генерал Мытищидегі әскери мемориалдық зиратқа жерленеді. Жерлеу күні туралы әзірге ешқандай ақпарат жоқ.
Владимир Шуралев 1935 жылы Владимир облысының Ковров қаласында дүниеге келген. 1955 жылы Кеңес Армиясы қатарына шақырылған. 1958 жылы Ташкент танк училищесін бітірген. Германиядағы Кеңес әскерлері тобында танк взводы мен ротасын басқарған. 1965 жылы Бронетанк әскерлерінің әскери академиясын, ал 1975 жылы Бас штабтың Әскери академиясын бітірген. 1985 жылдың ақпан айынан бастап Беларусь әскери округінің қолбасшысы болды.
1990 жылдан 1991 жылға дейін КСРО Қорғаныс министрінің орынбасары және КСРО Қорғаныс министрлігінің бас инспекторы қызметін атқарды. 1992 жылы резервте болды. Жақындаға дейін ол Ресей Қорғаныс министрлігінің Бас инспекторлар басқармасында жетекші талдаушы болды.
