Венгрия Еуропалық Одақтың келесі жылы Украинаға ірі көлемде қаржылай көмек көрсету жоспарын қолдамайды.
Бұл туралы Венгрия премьер-министрі Виктор Орбан мәлімдеді, деп хабарлайды РБК-Украина Sky News арнасына сілтеме жасап.
«Венгрия Ресейдің агрессиясын айыптап, украин халқын қолдағанымен, біз Украинаның мүдделерін өз еліміздің мүдделерінен жоғары қойғымыз келмейді», - деп атап өтті премьер-министр.
Көмек жоспары бойынша Украинаға келесі жылы энергетика және денсаулық сақтау мекемелерінің жұмысын қолдау, сондай-ақ зейнетақы бағдарламаларын қаржыландыру үшін 18 миллиард еуро тұрақты төлемдер түрінде беру көзделген.
Венгрияның оны мақұлдаудан бас тартуы жоспарды толығымен бұзу қаупін тудырады, себебі ЕО бюджет ережелеріне енгізілетін өзгерістер мүше мемлекеттердің бірауыздан мақұлдауын талап етеді.
ЕО көмек жоспарына балама ретінде Орбан ЕО-ға мүше 27 мемлекетке Украинаға қанша қаражат бөлуге дайын екенін анықтап, төлемдерді жабу үшін бірлескен несие алмай, соманы пропорционалды және әділ түрде бөлуді ұсынды.
Ол Венгрия Украинаға екіжақты шарттармен өз бюджетінен 160 миллион еуроға дейін қаржы беруге дайын екенін айтты.
Біз бұған дейін Венгрияның сыртқы істер министрі Петер Сийяртоның Еуропалық Одақтың Ресейге қарсы Украинаға толық ауқымды басып кіруінен кейін енгізілген санкциялар саясатын сынға алғанын хабарлаған едік.
