Вашингтондағы президент сайлауының нәтижелеріне наразылық білдірушілер сәрсенбі күні АҚШ Капитолийіне басып кірген кездегі тәртіпсіздіктер кезінде төрт адам қаза тауып, 52 адам тұтқындалды.
АҚШ астанасының полиция департаменті құрбан болғандардың бірі тәртіпсіздіктер кезінде полиция атып өлтірген әйел екенін растады, деп хабарлады The Hill басылымы.
Капитолий маңындағы бөлек оқиғаларда тағы бір әйел мен екі ер адам қаза тапты. Он төрт полиция қызметкері жарақат алды, олардың екеуі ауруханаға жатқызылды.
Елу екі адам тұтқындалды, оның ішінде 26-сы Капитолий аумағында. Төртеуі қаруды лицензиясыз алып жүргені үшін, ал біреуі тыйым салынған қаруды сақтағаны үшін тұтқындалды.
Полиция сонымен қатар Демократиялық және Республикалық ұлттық комитеттердің штаб-пәтерінің жанынан екі қолдан жасалған бомба тапты.
Сәрсенбі күні түстен кейін Джозеф Байденнің президенттік сайлаудағы жеңісін растау үшін Конгресс жиналған кезде наразылық білдірушілер Капитолийге басып кірді.
Тәртіпсіздіктер кезінде полиция қоршауы бұзылып, АҚШ парламентінің мүшелерін эвакуациялауға тура келді.
АҚШ Конгресі ғимараты 6 қаңтардың кешіне дейін демонстранттардан тазартылды, ал парламент өз сессиясын жалғастыра алды.
Вашингтон мэрі Мюриел Баузер сәрсенбі күні кешкі сағат 6-дан бейсенбі таңына дейін коменданттық сағат енгізді.
CNN 6 қаңтардағы тәртіпсіздіктер 19 ғасырдың басындағы Ұлыбританиямен соғыстан бері Капитолийге алғаш рет басып кіру болғанын атап өтті, сол кезде британ әскерлері 1814 жылы АҚШ Конгресінің ғимаратын басып алып, өртеп жіберген болатын.
