Краснодар өлкесінде Ресей Тергеу комитетінің тергеушілері Ішкі істер министрлігі мен Федералдық қауіпсіздік қызметінің қызметкерлерімен бірлесіп, 64 жастағы ер адамды ұстады.
«1959 жылы туған Сергей Денисенко Краснодар әкімшілігінің жұмылдыру бөлімі бастығының орынбасары Станислав Ржицкийдің өліміне күдікті ретінде ұсталды. Тұтқындау кезінде оның жанынан дыбыс өшіргіші бар тапанша табылды, ол кісі өлтіру кезінде қолданылған деп болжануда», - делінген Ресей тергеу комитетінің баспасөз қызметі Telegram-дағы мәлімдемесінде.
Ұсталған адам Краснодар әкімшілігінің жұмылдыру бөлімі бастығының орынбасары және «Краснодар» сүңгуір қайығының бұрынғы капитаны Станислав Ржицкийдің өліміне қатысы бар деген күдікпен тергелуде.
«Кубань 24» онлайн порталының хабарлауынша, Краснодар қалалық мэриясының жұмылдыру бөлімі басшысының орынбасары және Ресей Әскери-теңіз күштерінің зейнеткер офицері Станислав Ржицкий 10 шілде таңертең «Олимп» спорт сарайының жанындағы Жеңістің 30 жылдығы саябағында жүгіріп жүргенде қаза тапты. Белгісіз ер адам Ржицкийге бірнеше рет оқ атып, содан кейін қашып кетті. Құқық қорғау органдарының қызметкерлері кісі өлтірудің себебін тергеп жатыр. Қылмыстық іс қозғалды. Тергеушілер оқиғаның барлық мән-жайын анықтауда.
