Италияның Ansaldo Energia энергетикалық холдингі Өзбекстандағы алғашқы атом электр станциясын салу жобасына қосылуға дайын екенін мәлімдеді.
Uzatom агенттігінің хабарлауынша , компания мен мемлекеттік кәсіпорын өкілдері технологиялық серіктестіктің перспективаларын талқылады. Итальяндықтар өз инженерлерін құрылыстың негізгі кезеңдеріне тартуды ұсынды және күрделі энергетикалық жүйелерді басқарудағы тәжірибелерімен бөлісуге уәде берді.
Тараптар Өзбекстанның ыстық климатына бейімделген инженерлік шешімдерді енгізуге, сондай-ақ қауіпсіздік және техникалық бақылау мәселелеріне ерекше назар аударды.
Ansaldo Energia компаниясы радиоактивті қалдықтарды басқару және пайдаланылған ядролық отынды жою үшін өз технологияларын пайдалануды ұсынды, бұл сарапшылардың пікірінше, жобаның экологиялық тұрақтылығын жақсартудағы маңызды қадам болады. Сондай-ақ, компания өзбек мамандарына ядролық энергетиканы реттеу және лицензиялау бойынша кеңес беруге дайын екенін білдірді.
Жиззақ облысында алғашқы шағын атом электр станциясының ауқымды құрылысы басталды. Негізгі кезеңдердің бірі – болашақ электр станциясы ғимаратының іргетасын қазу – қазан айында басталды.
