Бірге біз Ресейді жауапкершілікке тартамыз, - деп сенімді түрде мәлімдеді Украина президенті Владимир Зеленский.
Халықаралық сотта Украинаның Ресейге қарсы ісінде 42 ел Украинаны қолдады.
Бұл туралы Украина президенті Владимир Зеленский өзінің Twitter парақшасында хабарлады.
«Халықаралық сотта Ресей Федерациясына қарсы ісінде Украинаның жағын қырық екі ел қолдап, біздің талап арызымызға қосылу ниетін мәлімдеді. Тарихтың дұрыс жағын таңдаған серіктестеріме алғысымды білдіремін. Бұл шындықтың, халықаралық құқықтың және әділеттіліктің жағы. Бірге біз Ресей Федерациясын жауапкершілікке тартамыз», - делінген мәлімдемеде.
Бұған дейін Украинаның әділет министрі Денис Малюска Ресейді қарулы агрессия үшін жауапқа тартатын трибунал Халықаралық сот аясында құрылатынын, бірақ ол бөлек құрылым болуы мүмкін екенін мәлімдеген болатын. Ол Халықаралық трибунал құру үшін көптеген елдер арасында халықаралық шартпен ресімделген келісім қажет екенін мәлімдеді.
«Мұндай келісім мен мұндай халықаралық шарт халықаралық ұйымдардың халықаралық қолдауына ие болуы керек. БҰҰ Бас Ассамблеясы, әрине, ең алдымен қарастырылып жатыр», - деді Малюска.
