Түркия президенті Режеп Тайып Ердоған Ресей президенті Владимир Путинмен Қара теңіз астығы бастамасы бойынша келіссөздер жүргізу ниетін мәлімдеді, деп хабарлайды Anadolu агенттігі.
«Менің ойымша, Ресей президенті Путин Қара теңіз астығы туралы келісімнің жалғасуын қалайды», - деп келтіреді агенттік Ердоғанның сөзін.
Сонымен қатар, Түркия президенті Түркия мен Ресейдің сыртқы істер министрлері Хакан Фидан мен Сергей Лавров телефон арқылы Қара теңіз бастамасын талқылайтынын мәлімдеді. Дегенмен, ол келіссөздердің қашан өтетінін нақтыламады.
Ердоғанның айтуынша, астық туралы келісім «тарихқа табысты дипломатияның үлгісі ретінде енді». Ол оның үзіліссіз жұмыс істей беретініне үміт білдіріп, Анкараның бұл мәселе бойынша «белсенді күш-жігерін» мәлімдеді.
Дүйсенбі күні Ресей Сыртқы істер министрлігінің өкілі Мария Захарова Ресей тарапы астық келісімін ұзартуға қатысты Анкараға, Киевке және БҰҰ-ға қарсылықтарын жолдағанын мәлімдеді.
«Ресей бүгін Түркия мен Украина тараптарына, сондай-ақ БҰҰ хатшылығына келісімді ұзартуға қарсылығы туралы ресми түрде хабарлады», - деді ол тілшілерге.
«Астық келісімі» 2022 жылдың 22 шілдесінде Ыстамбұлда жасалды. БҰҰ, Ресей, Түркия және Украинаның қатысуымен екі құжатқа қол қойылды: бірі Украинаның үш портынан (Чорноморск, Одесса және Южный) астық экспорты дәлізін құру туралы, екіншісі Ресей азық-түлік және тыңайтқыштарды экспорттауға кедергілерді алып тастау туралы. Бастама 2022 жылдың қарашасында наурыз айына дейін 120 күнге, содан кейін тағы екі рет екі айға ұзартылды. Мерзімі - 17 шілде.
