Ресей Сыртқы істер министрлігі Чехия елшісі Витезслав Пивонканы шақырып алды. Оған қарсы қатаң наразылық білдірілді.
Ресей елшілігінің алпыс үш қызметкері отбасы мүшелерімен бірге Чехиядан кетуге мәжбүр болады. Бұл туралы Чехияның сыртқы істер министрі Якуб Кулханек мәлімдеді, деп хабарлады бейсенбі, 22 сәуірде Чехия телеарнасы.
Министр бұл шара Чехия мен Ресей елшіліктеріндегі қызметкерлер саны бойынша «қатаң теңдікке» көшуге мүмкіндік беретінін түсіндірді.
Оның айтуынша, Прагадағы Ресей елшілігі мен Мәскеудегі Чехия елшілігінде жеті дипломат және 25 техникалық және әкімшілік қызметкер болады.
Өз кезегінде Ресей Сыртқы істер министрлігі Праганың ресейлік дипломаттарға қарсы жаңа әрекеттеріне байланысты Чехия елшісіне наразылық білдіруге үлгерді.
«Чехия Республикасының елшісі Витезслав Пивонка Ресей Сыртқы істер министрлігіне шақырылды. Оған бүгін Праганың Прагадағы Ресей елшілігінің қызметкерлеріне қарсы қабылдаған қосымша шектеу шараларына байланысты қатаң наразылық білдірілді», - деді Ресей Сыртқы істер министрлігінің өкілі Мария Захарова мәлімдемесінде.
Мәскеу «Чехия жалған сылтаулармен Ресейге қарсы науқанды жалғастырып, өз әрекеттерімен екіжақты қарым-қатынасты бұзып жатыр» деп санайды.
«Ультиматум тілі біз үшін қабылданбайтыны атап өтілді. Праганың дұшпандық әрекеттеріне жауап ретінде біз жергілікті жерде қабылданған адамдар санының айтарлықтай алшақтығын ескере отырып, Мәскеудегі Чехия елшілігіндегі қызметкерлер санын қысқартуды талап еттік. Елшіге Чехиядағы Ресейге қарсы истерикалық науқан одан әрі күшейген жағдайда басқа қадамдар жасау құқығымызды өзімізде қалдыратынымыз туралы хабарланды», - деп қосты Захарова.
Естеріңізге сала кетейік, осы аптаның басында Чехия құпия қызметтерге жұмыс істеді деген айыппен 18 ресейлік дипломатты елден шығарып жіберді.
Ресей Сыртқы істер министрлігі өз кезегінде Чехияның айыптауларына «американдықтардың қатысы бар» деп санады. Министрлік Чехиядағы әскери қоймадағы жарылысқа қатысты Ресейге тағылған күдіктерді «негізсіз, қисынсыз және абсурд» деп атайды.
Бұған жауап ретінде Мәскеу 20 чех дипломатын елден шығарып жіберді.
