Украина Ұлттық полициясының мәліметі бойынша, Ресейдің Тернопольге жасаған шабуылынан қаза тапқандар саны 20 адамға жетті.
Зардап шеккендердің арасында екі бала болды. Кәмелетке толмағандарды қоса алғанда, 60-тан астам адам жарақат алды.
Украина билігі Ресей күштері 19 қараша түні елдің батыс аймақтарына шабуыл жасады деп мәлімдеді. Украина жағының мәліметінше, Тернопольге жасалған шабуыл тоғыз қабатты ғимараттың ішінара қирауына әкеліп соқты, ал тағы бір көпқабатты үйде өрт шықты. Президент Владимир Зеленский «құтқару жұмыстары жалғасып жатқанын» және қаза тапқандар саны артуы мүмкін екенін мәлімдеді. Алдын ала мәліметтер бойынша, ғимаратқа Х-101 зымыраны тиген.
Львовта зымыран мен дрон шабуылынан кейін ірі өрт шықты. Энергетикалық нысан, қоймалар және ағаш өңдеу зауыты зақымдалды. Ровное және Ивано-Франковск облыстары зардап шекті. Ивано-Франковск облысында үш адам, оның ішінде екеуі бала, жарақат алды.
Польша көршілес Украина аймақтарына жасалған шабуылдардан кейін шекараны бақылау үшін жойғыш ұшақтарды әуеге көтерді. НАТО патрульдері де дайындыққа қойылды. Шекараны бұзу туралы ешқандай хабарлама болған жоқ.
Украинаның Энергетика министрлігі шабуылдардан кейін бірнеше аймақта электр қуатының апаттық түрде өшкенін хабарлады. Харьковта тұрғын үйлер мен азаматтық инфрақұрылым зақымдалды. Жергілікті билік бүгін таңертең 40-тан астам адамның жарақат алғанын хабарлады.
Зеленскийдің айтуынша, Ресей Украинаға 470-тен астам шабуылдаушы дрондар мен әртүрлі типтегі 48 зымыран ұшырды. Ресей Қорғаныс министрлігі «әскери-өнеркәсіптік және энергетикалық нысандарға» шабуыл жасағанын және «барлық белгіленген нысандарға соққы берілгенін» мәлімдеді.
