Солтүстік Атлантикалық Альянс жедел әрекет ету күштерінің санын 40 000-нан 300 000-нан астамға дейін арттыратынын мәлімдеді НАТО Бас хатшысы Йенс Столтенберг.
«Біз НАТО-ның жауап беру күшін өзгертіп, жоғары дайындықтағы күштеріміздің санын 300 000-нан астамға дейін арттырып жатырмыз», - деді ол Мадрид саммиті қарсаңында өткен баспасөз мәслихатында.
Столтенберг сонымен қатар НАТО альянстың шығыс қапталындағы жауынгерлік топтарды бригада деңгейіне дейін күшейтетінін атап өтті. Ол әскерлер санын арттырумен қатар, блок бірінші қорғаныс шебінің мүмкіндіктерін кеңейтуді және НАТО-ның жеке мүшелерін қорғау үшін қосымша күштер бөлуді көздеп отырғанын мәлімдеді.
«Мұның бәрі қырғи қабақ соғыстан бергі біздің ұжымдық қорғаныс пен тежеу жүйеміздегі ең үлкен реформаны білдіреді», - деп атап өтті Столтенберг.
Ол сондай-ақ НАТО-ның Ресейге қатысты стратегиясы алдағы саммитте қайта қаралатынын айтты. Альянстың соңғы стратегиясында Ресей стратегиялық серіктес ретінде сипатталған.
«Мен одақтастардың Ресейдің біздің қауіпсіздігімізге, құндылықтарымызға және ережелерге негізделген халықаралық тәртіпке тікелей қауіп төндіретінін анық түсінуін күтемін», - деді ол.
Алдағы НАТО саммитінде Солтүстік Атлантикалық Альянстың жаңа стратегиялық тұжырымдамасын қабылдау жоспарлануда.
