Ресей президенті Владимир Путиннің әкімшілігі мемлекеттік және үкіметшіл БАҚ-тарға арналған нұсқаулық дайындады, онда Ресейде және бүкіл әлемде 2022 жылғы оқиғаларды қалай дұрыс қорытындылау керектігі түсіндіріледі, деп хабарлайды тәуелсіз ресейлік Meduza БАҚ.
Нұсқаулықтың авторлары БАҚ-қа Владимир Путиннің Украинаға әскер жіберу арқылы «Украина мен НАТО-ның Ресей аумағына шабуыл жасауының алдын алып, жалғыз дұрыс шешім қабылдағанын» тағы да баса айтуды «ұсынады».
Құжатта сондай-ақ Батыс елдерінің 2014 жылдан бері Ресейге шабуыл жасауға дайындалып жатқаны және «орыс халқын бөліп, жаулап алғысы» келетіні айтылған (Ресей 2014 жылы Қырымды аннексиялап, Донбасста соғыс бастады).
Құжатта «Путин Еуропаға есін жиып, егемендігі мен болашағын қайтарып алуға мүмкіндік беріп отырғаны» атап өтілген. Қазіргі уақытта еуропалық елдер Америка Құрама Штаттарының «вассалы» және «шеткі аймақтары» болып табылады. Олардың болашағы тек «Ресеймен тығыз ынтымақтастықта» ғана мүмкін екені айтылады.
