«Әлем мұны жақын арада өз көзімен көреді»: Ким Чен Ын жаңа стратегиялық қарудың жасалғанын жариялады.
Солтүстік Корея көшбасшысы Ким Чен Ын дәстүрлі Жаңа жылдық сөзінен бас тартты. Оның орнына Солтүстік Кореяның мемлекеттік телеарнасы Ким Чен Ынның желтоқсан айының соңында өткен Корея Еңбек партиясы Орталық комитетінің төрт күндік отырысындағы сөзін көрсетті, деп хабарлайды Bloomberg.
Жергілікті теледидардан көрсетілген кадрларда Ким Чен Ын жиналғандарға сөз сөйлеп, ядролық сынақтарға қойылған мораторийге енді бағынбайтынын айтты. Ол жақын арада орналастырылуы мүмкін «жаңа стратегиялық қаруды» жариялады.
Басылым Ким Чен Ынның 2013 жылдан бері теледидардан үндеу жасап келе жатқанын атап өтеді. Жаңа жылдық таңертеңгілік үндеулер дәстүрін оның атасы Ким Ир Сен 1940 жылдары қалыптастырған. «Бір жыл бұрын, Ким мен Трамп арасындағы дипломатия перспективалы болып көрінген кезде, Солтүстік Корея көшбасшысы жаңа жылдық үндеуін айту үшін ресмиліктен бас тартты», - деп атап өтеді Bloomberg.
Корея орталық жаңалықтар агенттігінің (KCNA) сәрсенбідегі хабарламасында «әлем жақын арада КХДР-дың жаңа стратегиялық қаруын өз көзімен көреді» делінген. Ким Чен Ын Вашингтонның Пхеньянмен диалогты өз мақсаттары үшін пайдалануына жол бермейтінін қосты.
2019 жылдың 31 желтоқсанында Пхеньянның Вашингтонға ядролық қарудан арылу келіссөздерінде ымыраға келу үшін берген мерзімі аяқталды. АҚШ пен Солтүстік Корея ядролық қарудан арылу келіссөздерін 2018 жылы бастады. Саммиттер 2018 жылдың маусымында Сингапурде, ал 2019 жылдың ақпанында Ханойда өтті. 30 маусымда Ким Чен Ын мен Дональд Трамп Оңтүстік Корея мен Солтүстік Корея арасындағы Панмунджом шекара бекетінде кездесті. Қыркүйек айында АҚШ президенті жыл соңына дейін Ким Чен Ынмен кездесуді жоспарлап отырғанын мәлімдеді. Алайда, диалог қайта жанданбады.
