Израиль ғалымдары «синтетикалық эмбриондар» жасау арқылы ғылымда үлкен жетістікке жетті, деп хабарлайды Tengrinews.kz WIONews сайтына сілтеме жасап.
Израильдің Вейцман ғылым институтының ғалымдары өз зерттеулерінде тышқанның бағаналы жасушалары ішек жолы, ми және жүрек бастаулары бар ерте эмбриондық құрылымдарға өздігінен жинала алатынын анықтады. Олар жасаған эмбриондар «синтетикалық» деп аталды, себебі оларды өндіру үшін ұрықтандырылған жұмыртқа жасушалары қажет емес.
«Біз эмбриондық бағаналы жасушалардың плацента мен эмбрионды қоршаған сарыуыз қапшығын қоса алғанда, тұтас «синтетикалық эмбриондарды» жасайтынын көрсетеміз», - деді зерттеу жетекшісі профессор Джейкоб Ханна.
Ғалымдар кейбір жасушалардың плацентаға немесе сарыуыз қапшығына айналу үшін генетикалық бағдарламаларды іске қосатын химиялық заттармен алдын ала өңделгенін, ал басқаларының араласусыз дамығанын түсіндірді.
Бағаналы жасушалардың көпшілігі эмбрион тәрізді құрылымдарды қалыптастыра алмады, бірақ шамамен 0,5 пайызы жеке тіндер мен мүшелерге өсіп, кішкентай шарларға айналды. «Синтетикалық эмбриондардағы» жасушалардың ішкі құрылымы мен генетикалық профильдері табиғи тышқан эмбриондарымен 95 пайызға бірдей болды.
Бұл жаңалық табиғи эмбриондардың дамуы кезінде мүшелер мен тіндердің қалыптасу процесін жақсырақ түсінуге көмектеседі деп күтілуде. Зерттеушілер сонымен қатар олардың жұмысы жануарларға эксперименттер жүргізу қажеттілігін азайтады және сайып келгенде адамдарға трансплантациялау үшін жасушалар мен тіндердің жаңа көздеріне жол ашады деп санайды. Мысалы, бұл технология лейкемияны емдеу үшін тері жасушаларын сүйек кемігінің бағаналы жасушаларына айналдыру үшін пайдаланылуы мүмкін.
Бұған дейін ғалымдар алғаш рет жатыр трансплантациясының бедеулікті емдеудегі тиімділігін көрсетті.
