Қытайдың Бас кеден басқармасы Владивостокты ішкі сауда үшін транзиттік порт деп жариялады, деп хабарлайды VPost Ресей Сыртқы істер министрлігінің Владивостоктағы өкілдігінің мәлімдемесіне сілтеме жасай отырып.
Енді Қытайдың бір провинциясынан екінші провинциясына жөнелтілетін жүктер Владивосток арқылы кедендік рәсімдерсіз өтеді.
Бұл шешім 1 маусымнан бастап күшіне енеді және Қытайдың солтүстік-шығысынан оңтүстікке тасымалданатын тауарларға әсер етеді. Бұрын Ресеймен шекаралас Цзилинь провинциясынан келетін жүктер әдетте Қытайдың қарама-қарсы шетіне жөнелтіліп, Сары теңіздегі порттарға дейін 1000 шақырым жүретін. Енді ол Владивостокқа дейін бірнеше жүз шақырым ғана тасымалданады. Онда контейнерлер кемелерге қайта тиеліп, алушыға жөнелтіледі.
Қытай үшін солтүстік-шығыс-оңтүстік логистикалық бағытының құрлық бөлігін бес есеге қысқарту мүмкіндігі өте маңызды: ел Қытайдың солтүстік-шығысындағы өнеркәсіпті жандандырудың стратегиялық жоспарын бекітті, ол өндірістің жылдам өсуін көздейді. Дегенмен, VPost көлік саласындағы дереккөздерінің мәліметінше, Владивостоктың инфрақұрылымы жүк тасымалының айтарлықтай өсуін көтере ала ма, жоқ па, әлі белгісіз.
Өткен жылдың қыркүйек пен желтоқсан айлары аралығында Владивосток портында кептелістер пайда болды, кемелер жүкті түсіру үшін екі аптаға дейін күтуге мәжбүр болды. Дереккөздер басылымға күзге қарай кептеліс қайталануы мүмкін екенін хабарлады.
