Дүниежүзілік денсаулық сақтау ұйымының (ДДСҰ) мәліметі бойынша, Еуропада COVID-19 жұқтырған жаңа жағдайлар саны бір күнде алғаш рет 100 мыңнан асты.
Осыған байланысты көптеген ЕО елдері, кем дегенде ең көп зардап шеккен аймақтарда, жаңа карантин шараларын енгізуді талқылап жатыр. Бұл қоғамдық наразылықты тудыруда.
Сенбі күні Варшавада, Лондонда және Римде жаппай наразылық акциялары өтті. Бұл қалаларда мыңдаған адам көшеге шығып, маска киюді талап етуге, мейрамханалардың жабылуына және мектептер мен қоғамдық іс-шаралардың тоқтатылуына наразылық білдірді. Наразылық білдірушілер мұндай шаралар азаматтардың құқықтарын бұзады және экономикаға кері әсер етеді деп мәлімдейді.
Соған қарамастан, барлық белгілер COVID-19 екінші толқыны Еуропаға келгенін көрсетеді. Италияда күн сайын 5000 жаңа жағдай анықталады. Ұлыбританияда бұл көрсеткіш екі есе жоғары. Ауру жағдайлары әсіресе Англияның солтүстігінде, Шотландияда, Солтүстік Ирландияда және Уэльстің бірнеше аймағында жоғары. Өлім-жітім саны да өсуде, бірақ көктемдегі пандемияның шарықтау шегіндегідей тез емес.
Германия астанасының мэрі Михаэль Мюллер жұма күні Берлиндегі коронавирустық жағдайдың шиеленіскенін жариялап, инфекциядан қорғану үшін қатаң шаралар қабылдауға шақырды.
Ресейде коронавирус жұқтырғандардың тәуліктік өсімі 12 126-ны құрады. Бұл эпидемия басталғаннан бергі ең жоғары көрсеткіш. Бұған дейінгі ең жоғары тәуліктік өсім 11 мамырда (11 656) тіркелген болатын.
