Эстония биыл қаңтар айының соңына дейін Таллинн мұздатып қойған ресейлік активтерді Украинаға беруге мүмкіндік беретін заңнамалық база құруды жоспарлап отыр. Бұл туралы Эстония Сыртқы істер министрлігінің өкілі Михель Тамм мәлімдеді, деп хабарлайды Bloomberg дүйсенбі, 9 қаңтарда.
Осылайша, Эстония Ресей активтерін Киевке берген алғашқы Еуропалық Одақ елі бола алады — кем дегенде, басқа ешбір ел мұндай механизмнің жақын арада құрылатынын жариялаған жоқ, деп атап өтті Bloomberg.
Бұған дейін осы агенттік Германия үкіметіндегі дереккөздерге сілтеме жасай отырып, шамамен 5 миллиард еуро мұздатылған Германияның да Ресей активтерін Украинаға беру мүмкіндігін қарастырып жатқанын хабарлаған болатын. Дегенмен, Берлин Еуропалық Одақтан біріктірілген ұстанымды күтіп отыр және сот ісін жүргізу толқынына әкелуі мүмкін қауіпті, біржақты қадамдар жасауға дайын емес.
Эстония мұздатып қойған ресейлік қаражаттың жалпы сомасы 20 миллион долларды (19 миллион еуро) құрайды. Жалпы алғанда, Еуропалық Одақ ресейлік активтердің 68 миллиард еуросын мұздатты, оның 90 пайызы Бельгия, Люксембург, Италия, Германия, Ирландия, Австрия және Францияда.
