Сәрсенбі, 23 тамыз күні кешке Тверь облысында ұшақ апатқа ұшырады. Қазіргі уақытта апат орнында үлкен өрт өршіп тұр. Алдын ала мәліметтер бойынша, қаза тапқандар мен жарақат алғандар бар, деп хабарлайды «Известия»
Төтенше жағдайлар қызметі жеке ұшақтың апатқа ұшырағанын растады. «Мәскеуден Санкт-Петербургке бара жатқан Embraer Legacy жеке ұшағы Тверь облысындағы Куженкино ауылының маңында апатқа ұшырады», - деп хабарлады Ресей Төтенше жағдайлар министрлігі.
Ксения Собчак оқиғаға қатысты түсініктеме берді. «Менің дереккөздерім Евгений Пригожинге тиесілі Embraer ұшағы Тверь облысында апатқа ұшырағанын хабарлайды. Бұл Хотиловодан 15 шақырым жерде болды. Біздің ақпаратымыз бойынша, бортта үш экипаж мүшесі және жеті жолаушы болған. Пригожиннің өзі бортта болған-болмағаны белгісіз», - деп жазды журналист өзінің жеке Telegram арнасында.
Жаңартылған ақпаратқа сәйкес, апат салдарынан 10 адам қаза тапты. Бортта болғандардың кім екені әлі жарияланған жоқ. Ұшақ Мәскеуден Санкт-Петербургке ұшып бара жатқан.
Тверь облысы губернаторы Игорь Руденяның баспасөз қызметі апатқа ұшыраған ұшақтың азаматтық ұшақ екенін атап өтті. Облыс губернаторы оқиғаны жеке бақылауына алды. Құқық қорғау органдары оқиға орнында тергеу жүргізуде, ал төтенше жағдайлар қызметі оқиға орнында жұмыс істеп жатыр.
Ұшақ апатының видеолары интернетте таралып жатыр.
