Украина әуе күштерінің қолбасшысы генерал-лейтенант Николай Олещук Киев үстінде ресейлік «Кинжал» гипердыбыстық зымыраны атып түсірілгені туралы Украина билігінің бір күн бұрын жоққа шығарған ақпаратын растады, деп хабарлайды BBC Орыс қызметінің тілшісі.
Бұл туралы Николай Олещук өзінің Telegram арнасында жазды.
«Украина халқын осы тарихи оқиғамен құттықтаймын! Иә, біз «теңдесі жоқ» Кинжалды атып түсірдік! Бұл 4 мамырда Киев аспанында түнгі шабуыл кезінде болды. Х-47 зымыраны Ресей аумағынан МиГ-31К ұшағынан ұшырылды», - деп жазды ол.
Генералдың айтуынша, зымыран американдық Patriot әуе қорғаныс жүйесі арқылы жойылған.
Бұл ақпарат кеше украиналық «Defense Express» басылымында зымыран сынықтарының фотосуреттерімен бірге жарияланды. Алайда, Украина Қарулы Күштері бастапқыда оны БАҚ-тың ойдан шығарған ақпараты деп жоққа шығарды.
Олещук өзінің хабарламасында мұны қарсылас пайдалана алатын ақпаратты алдын ала жариялау мүмкін емес деп түсіндіреді.
«Біз не, қайда, немен және қашан атып түсірілгенін міндетті түрде хабарлаймыз! Барлығын уақытында хабарлаймыз», - деп жазды ол.
