Украина 1932 және 1933 жылдар аралығында миллиондаған адамның өмірін қиған Ұлы ашаршылық - Голодомордың 90 жылдығын атап өтуде. 2006 жылы Украина Жоғарғы Радасы бұл апатты украин халқына қарсы геноцид актісі деп жариялады. Голодоморды АҚШ, Канада және Польшаны қоса алғанда, шамамен 20 ел геноцид деп таныды.
Жаппай ашаршылық сталиндік режимнің шаруаларды өз жерлері мен жеке мүлкін ұжымдық шаруашылықтарға беруге мәжбүрлеу саясатынан туындады. Қарсылық көрсеткендер жер аударылды, ал бұл шаралар көптеген көтерілістерді, соның ішінде қарулы көтерілістерді тудырды.
1932 жылы Кеңес өкіметі тәртіпсіздіктерді басу үшін шектеулерді күшейтіп, шаруалардан азық-түлік тәркіледі. Коммунистердің ұйымдасқан топтары үйлерді тонап, астықты қоса алғанда, жеуге жарамдының бәрін ұрлады.
Нәтижесінде, әртүрлі бағалаулар бойынша, сол кездегі шекараларда Украина КСР-нің 4-тен 10 миллионға дейінгі тұрғыны, басқаша айтқанда, елдің бүкіл халқының 12%-дан 30%-ға дейінгісі аштықтан қырылды.
Бүгінде Украина мен оның одақтас елдеріндегі көптеген адамдар сол оқиғалар мен Ресейдің қазіргі басып кіруі арасында ұқсастықтар жасап, екі жағдайда да мақсат бір екенін атап өтуде: украин ұлтын өмір сүру құқығынан айыру.
