247-ші гвардиялық полкінің әуе-шабуылдау батальонының командирі, Ресей батыры Дмитрий Лисицкий қайтыс болды. Бұл туралы Ставрополь өлкесіндегі Благодарненск қалалық округінің басшысы Александр Тенков хабарлады. Украина оның соғыс кезінде қаза тапқанын мәлімдеді. Ресейлік Telegram арналары оның өлімін суицид деп хабарлауда.
«Ставрополь үшін үлкен шығын. Дмитрий Лисицкий қызмет барысында көптеген жауынгерлік операцияларға қатысып, батылдық пен ерлік көрсетті. Ол бірнеше ыстық нүктеде қызмет етті», - деп жазды Ставрополь өлкесіндегі Благодарненск қалалық округінің басшысы Александр Тенков.
Ол Лисицкийдің өлімінің себебін нақтыламады.
Лисицкийдің қазасы туралы бір күн бұрын алғашқы болып хабарлаған украин журналисті Юрий Бутусов оны украин сарбаздары өлтіргенін айтады. Лисицкий оқыған Ставрополь мемлекеттік аграрлық университетінің ректоры Владимир Ситников та Лисицкийдің «майдан шебінде» қазасы туралы жазды.
«Біздің сарбаздарымыз 2014 жылы украин қорғаушыларын қырғынға ұшыратқандардың бірі болған Ресей армиясының офицері Дмитрий Лисицкийді жойды», - деді Одесса әскери әкімшілігінің өкілі Сергей Братчук.
Ресейлік Telegram арналары Baza және "Қанды ханым" Лисицкийдің өзіне-өзі қол жұмсағанын мәлімдеді. 2023 жылдың 26 наурызында Ресей батырының оқ тиген денесі Ставропольдегі пәтерінен табылды деп болжануда.
Лисицкий Абхазия, Шешенстан, Сирия, Украина және Югославиядағы соғыстарға қатысқан. Сондай-ақ, ол 2014 жылдың тамыз айында Украинаның шығысындағы Иловайск үшін болған шайқасқа қатысқан деп айтылады. Украина үкіметінің мәліметінше, Ресейдің тұрақты армия бөлімшелері сепаратистерге көмекке келіп, қаладағы украин әскерлерін қоршауға алған. Дегенмен, Ресей жағы Иловайск үшін болған шайқасқа қатысы барын жоққа шығарады.
Дмитрий Лисицкий Ресей Батыры атағын 2015 жылдың басында алды. Қандай қызметтері үшін ресми түрде көрсетілмеген.