Құрылғыны халықаралық ғалымдар тобы Санкт-Петербург зерттеушілерімен бірлесіп жасаған. Лазердің өлшемі бір миллиметрден үш мың есе кіші.
Ғалымдар әлемдегі ең кішкентай жартылай өткізгіш лазерді жасады. Әзірлеуді Санкт-Петербург ақпараттық технологиялар, механика және оптика ұлттық зерттеу университетінің зерттеушілерімен бірлесіп, халықаралық ғалымдар тобы жүзеге асырды. Бұл туралы Ресей университетінің баспасөз қызметі хабарлады.
«Ғалымдар тобы бөлме температурасында көрінетін диапазонда жұмыс істейтін әлемдегі ең ықшам жартылай өткізгіш нанолазердің жасалғанын жариялады», - делінген хабарламада.
Бұл лазердің перовскит нанобөлшегі екені атап өтілді. Құрылғының өлшемі 310 нанометрді құрайды, бұл бір миллиметрден 3000 еседен астам кіші.
Зерттеушілер нанолазер үшін перовскитті таңдады, себебі ол белсенді орта және резонатор ретінде әрекет ете алады, яғни ол лазерлік сәулеленуді тудырып, электромагниттік энергияны ұзақ уақыт сақтай алады.
«Алынған нанолазердің бірегейлігі тек оның өлшемінде ғана емес. Ол сондай-ақ ынталандырылған сәулелену энергиясын жақсы сақтайды, лазерлік генерация үшін электромагниттік өрістердің жеткілікті күшейтілуін қамтамасыз етеді», - деп мәлімдеді ғалымдар.
Зерттеушілер жаңа құрылғының қалыпты жағдайда — стандартты атмосфералық қысым мен бөлме температурасында — жұмыс істейтінін атап өтті.
Ғалымдар бұл лазерді ақпаратты беру және өңдеу үшін жарықты пайдаланатын оптикалық чиптерді, сенсорларды және басқа да құрылғыларды жасау үшін пайдалануға болатынын айтады.
