Кремль Ресей күштеріне қазан айының басында, Қырым көпіріндегі жарылыс болмас бұрын, Украинаның азаматтық инфрақұрылымына ірі көлемді зымырандық соққылар дайындауды бұйырды, деп хабарлайды UNIAN Украина Қорғаныс министрлігінің Бас барлау басқармасының ақпаратына сілтеме жасай отырып.
«Украина әскери барлау қызметінің мәліметі бойынша, 2 және 3 қазанда Ресейдің оккупациялық күштері Кремльден Украинаның азаматтық инфрақұрылымына қарсы ауқымды зымырандық соққылар дайындау туралы бұйрық алды», - делінген мәлімдемеде. «Әуе күштеріне ауқымды зымырандық соққыларға дайындалу туралы бұйрық берілді. Анықталған нысаналар азаматтық инфрақұрылым мен Украина қалаларының тығыз қоныстанған орталық аудандарын қамтыды».
Баяндамада Ресейдің негізгі мақсаттары украиндықтар арасында үрей тудыру және еуропалық қоғамды қорқыту болғаны айтылған.
Хабарланғандай, дүйсенбі, 10 қазан күні таңертең Украина қалалары Ресей күштерінің жаппай зымыран шабуылынан шайқалды. Ресей Киевтің орталығына және Винница, Львов, Николаев, Тернополь және Житомир облыстарына бірқатар зымыран шабуылдарын жасады.
Украинаға дәл басқарылатын зымырандармен шабуыл жасалғаны белгілі. Х101 және Х555 зымырандары Каспий теңізі аймағынан стратегиялық бомбалаушы ұшақтардан ұшырылды. Шабуылда Қара теңізден ұшырылған Калибр зымырандары, сондай-ақ Искандер, С-300 және Торнадо зымырандары да қолданылды.
Қазіргі уақытта 10 адамның қаза тауып, 60 адамның жарақат алғаны белгілі, деп хабарлады Украина Ұлттық полициясының баспасөз хатшысы Марьяна Рева ұлттық телемарафонда.
Полиция қызметкерлері террористік шабуылдар болған жерлерде жұмыс істеп, адамдарға көмектесіп, шабуылдың барлық салдарын құжаттап жатыр.
