Ресей президенті Владимир Путин резервтегі азаматтарды әскери дайындықтан өткізу туралы жарлыққа қол қойды. Тиісті құжат ресми құқықтық ақпарат порталында жарияланды.
Жарлықта резервшілер Ресей Қарулы Күштерінде, Ұлттық гвардияда, сондай-ақ мемлекеттік қауіпсіздік органдарында және Федералдық қауіпсіздік қызметінде әскери дайындықтан өтеді деп көрсетілген.
Ресей үкіметі мен аймақтық атқарушы билік органдары азаматтарды әскери дайындыққа шақыруға байланысты шаралардың жүзеге асырылуын қамтамасыз етуге міндетті. Бұл жарлық жарияланған күнінен бастап күшіне енеді.
Бұған дейін Мемлекеттік Думаның спикері Вячеслав Володин мемлекеттік лауазымдарға тек әскери қызметтен өткен және әскери тіркеу біліктілігін алған ресейліктерді қабылдауды ұсынған болатын. Володиннің айтуынша, болашақта кадрлық шешімдердің барлығы әскери қызметті ескере отырып қабылдануы керек.
