Оңтүстік Кореядағы ауылшаруашылық өнімдерін тарату зауытында робот қателесіп қызметкерді конвейер таспасына қысып қойды. Ер адам алған жарақаттарынан қайтыс болды, деп хабарлайды Sky News.
Робототехника компаниясының маманы (аты-жөні көрсетілмеген) сынақтан өткізбес бұрын роботтың сенсорларын тексеру үшін тарату орталығына келді. Робот көкөністер салынған қораптарды паллеттерге үйіп қоюы керек еді.
Оқиға болған Кёнсаннамдо провинциясы полициясының мәліметінше, робот техникті жәшік деп қателесіп, оны конвейер таспасына қысып, «қашып кетуге ешқандай мүмкіндік бермей», беті мен кеудесін жаншып тастаған. Зардап шегуші дереу ауруханаға жеткізілді. Алайда, ол алған жарақаттарынан қайтыс болды.
Құқық қорғау органдары тарату орталығының қауіпсіздік қызметкерлерінің әрекеттерін бағалайды. Оқиғаға кінәлі жұмысшыларға немқұрайлылық үшін қылмыстық айып тағылуы мүмкін. Зауыттың иесі болып табылатын компания әзірлеушілерді жүйенің адам өміріне қауіп төндірмейтініне көз жеткізу үшін оны жақсартуға шақырды.
