Бірінші ханымның аппарат басшысы және Ақ үйдің бұрынғы баспасөз хатшысы Стефани Гришам Вашингтондағы президент сайлауының нәтижелеріне байланысты наразылық акцияларынан кейін қызметінен кетті, деп хабарлайды «Коммерсант» MSNBC арнасына сілтеме жасап.
Ақ үйдің баспасөз хатшысының орынбасары Сара Мэттьюс пен хаттама хатшысы Рики Ницета да қызметінен кету туралы өтініш берді.
«Конгресс залдарында қызмет еткен адам ретінде, бүгін куә болған оқиға мені қатты алаңдатты [...] Мен дереу отставкаға кетемін. Біздің халқымызға биліктің бейбіт түрде ауысуы қажет», - деді Мэттьюс телеарнаға.
MSNBC және CNN дереккөздерінің хабарлауынша, ұлттық қауіпсіздік жөніндегі кеңесші Роберт О'Брайен, ұлттық қауіпсіздік жөніндегі кеңесшінің орынбасары Мэтт Поттингер және көлік министрі Элейн Чао қызметінен кетуі мүмкін. Бұл ақпарат әлі расталған жоқ.
6 қаңтардың кешінде Дональд Трамптың жақтастары Джо Байденге президенттік жеңіске жетуге мүмкіндік беретін сайлау дауыстарын растау рәсімі өтіп жатқан Вашингтондағы АҚШ Капитолий ғимаратына басып кірді. Сессия тоқтатылып, бірнеше сағаттан кейін ғана қайта жалғасты. Наразылық акциялары төрт адамның өліміне және 50-ден астам адамның тұтқындалуына әкелді. Демонстранттарды тарату үшін қосымша полиция мен Ұлттық гвардия тартылды. Вашингтонда төтенше жағдай және коменданттық сағат жарияланды.
