Ресей сыртқы істер министрі Сергей Лавров Молдовада орыс тілді тұрғындардың бар екенін айтып, оларды «қорғауға» уәде берді. Лавров нақты не айтқысы келгенін түсіндірмеді.
Ресей сыртқы істер министрі бұл мәлімдемені жаңа оқу жылының басталуына орай орыс балаларына арнаған сөзінде жасады. Ол сондай-ақ Гагаузияның Молдова құрамындағы бар екеніне назар аударып, оған кеңірек автономия беру керектігін меңзеді (бейнені көру үшін беттің төменгі жағына өтіңіз).
«Біз Молдова мен Приднестровьенің орыс тілді халқының мүдделеріне ешқандай зиян келтірілмеу үшін барлығын жасаймыз. Сондай-ақ, Приднестровьеден басқа, Молдоваға Гагаузия да кіретінін ұмытпайық, ол да ерекше мәртебеге ұмтылып отыр және қазірдің өзінде осы ерекше мәртебенің белгілі бір элементтеріне ие», - деді Лавров.
Ол сондай-ақ Молдова билігі «Батыс таңған геосаяси ойындарды тоқтатып, қатар тұратын халықтың мүдделерін ойлауы керек» деп мәлімдеді.
Ресей сыртқы істер министрі Сергей Лавров 2014 жылы Молдовада «Украина сценарийі» қайталануы мүмкін екенін мәлімдеген болатын. Ол егер Молдова өзінің әскери-саяси мәртебесін өзгерткен жағдайда Приднестровье кенеттен «болашағын дербес анықтауға» шешім қабылдаса, Ресей Приднестровьені қолдайтынын мәлімдеді.
2022 жылдың мамыр айында Молдова президенті Майя Санду Ресейді басып алынған Приднестровьеден әскерлерін шығаруға шақырды. Ол өз халқының соғысты немесе аймақтағы тұрақсыздықты қаламайтынын мәлімдеді.
