Женевада өткен БҰҰ Адам құқықтары кеңесінің отырысында бейнебайланыс арқылы сөйлеген Ресей сыртқы істер министрі Украинаға жасалған шабуылды украин тарапының адам құқықтарын бұзуымен ақтады.
Ресейдің Украинада бастаған соғысына наразылық ретінде ондаған елдің өкілдері сейсенбі, 1 наурызда Женевадағы БҰҰ Адам құқықтары жөніндегі кеңесінің отырысынан Ресейдің сыртқы істер министрі Сергей Лавровтың сөзі басталмас бұрын шығып кетті, деп хабарлайды dpa. «Адам құқықтары жөніндегі кеңесті дезинформация алаңы ретінде пайдалануға болмайды», - деді алдын ала дайындалған наразылық акциясына қатысқан Германияның БҰҰ-дағы тұрақты өкілі Катарина Сташ. «Сыртқы істер министрі Лавровтың қорқынышты мәлімдемелері фактілерді циникалық бұрмалау екенін көрсету керек».
БҰҰ Адам құқықтары жөніндегі кеңесі көктемгі сессиясын дүйсенбі, 28 ақпанда бастады. Отырысқа бейнебайланыс арқылы қосылған Лавров Украинаға жасалған шабуылды ақтап, украин жағын адам құқықтарын бұзды деп айыптаған ұзақ мәлімдеме оқыды. Ол бастапқыда кездесуге жеке қатысуды жоспарлаған, бірақ Еуропа әуе кеңістігі Ресей ұшақтары үшін жабылғаннан кейін оның сапары тоқтатылды.
Лавров өз сөзінде Украинаны елдегі орыс тілді азшылықты көптеген жылдар бойы «террорға» ұшыратты деп айыптады. Олардың адам құқықтары көптеген жолдармен бұзылып жатқанын мәлімдеді ол, Батыс мұны бақылап қана қоймай, қолдағанын да қосты. Осыған байланысты ол бірнеше рет Америка Құрама Штаттарын, Канаданы және Еуропалық Одақты атап өтті. Ресей сыртқы істер министрі Батыс елдерінің заңсыз деп атаған санкцияларға әуестеніп кеткенін атап өтті. Ол жазалау шаралары қарапайым адамдарға бағытталған деп санайды.
