Ресейдің басып кіру қаупі төнген кезде, қазіргі дағдарыс туралы ақпарат жинау үшін Еуропалық Парламенттің делегациясы Украинаға жіберіледі.
Бұл туралы РБК-Украина Еуропарламенттің сайтына сілтеме жасап хабарлайды.
Хабарланғандай, сегіз Еуропарламент депутатынан тұратын жоғары деңгейлі делегация 30 қаңтар мен 2 ақпан аралығында Украинаға сапар шегеді. Фактілерді анықтау миссиясын Сыртқы істер комитетінің төрағасы Дэвид Макаллистер және Қауіпсіздік және қорғаныс кіші комитетінің төрағасы Натали Луазо басқарады.
«30 қаңтар мен 2 ақпан аралығындағы сапар барысында мүшелер жағдайды жергілікті жерде бақылап, Еуропарламенттің украин халқымен ынтымақтастығын және Ресейдің дағдарысты одан әрі ушықтыруға бағытталған кез келген қадамдарын қабылдамайтынын көрсетеді», - делінген мәлімдемеде.
Делегация Украина Жоғарғы Радасының спикері Руслан Стефанчукпен кездеседі, сондай-ақ президент Владимир Зеленскиймен, премьер-министр Денис Шмыгалмен, сыртқы істер және қорғаныс министрлерімен кездесуді сұрады.
Еуропарламент депутаттары сондай-ақ Ұлттық қауіпсіздік және қорғаныс кеңесінің хатшысы Алексей Даниловпен және Жоғарғы Раданың бірнеше комитеттерінің мүшелерімен келіссөздер жүргізеді.
Естеріңізге сала кетейік, АҚШ Мемлекеттік хатшысының орынбасары Венди Шерман бұған дейін Ресей президенті Владимир Путин қазір немесе ақпанның ортасында Украинаға басып кіру үшін әскерлерді пайдалануы мүмкін екенін мәлімдеген болатын.
Ал АҚШ президенті Джо Байден Украинаға басып кіру жағдайында АҚШ Ресейге қарсы санкциялар енгізетінін және бұл шектеулер Путинге жеке әсер етуі мүмкін екенін мәлімдеді.
