Латвияның Ұлттық электронды бұқаралық ақпарат құралдары кеңесі көрермендерге қолжетімді болып қалған Ресейде тіркелген 80 телеарнаның хабар таратуына тыйым салды, деп хабарлайды Meduza Delfi-ге сілтеме жасай отырып.
Шешім басқа елдің аумақтық тұтастығы мен тәуелсіздігіне қауіп төндіретін бағдарламаларды Латвияда таратуға болмайтыны туралы заң негізінде қабылданды.
Сонымен бірге, Электронды бұқаралық ақпарат құралдарының ұлттық кеңесі Украинадағы соғыс басталғаннан кейін Ресейдегі жұмысын тоқтатқан «Дождь» телеарнасына хабар тарату лицензиясын берді. Кеңес төрағасы Иварс Аболиньштің айтуынша, «Дождь» Ригадан хабар таратады және 9 маусымнан бастап Латвияда тіркелген БАҚ тізіміне енгізіледі.
Латвия бұған дейін Ресейдің Украинаға басып кіруіне жауап ретінде Ресейдің ірі мемлекеттік телеарналарының елде хабар таратуына тыйым салған болатын.
Ресейдің Украинамен соғысы басталғаннан кейін Ресейдің Бас прокуратурасы «Дождь» телеарнасына кіруді жауып тастады. Кейіннен хабар таратуды тоқтатты. Жетекші «Дождь» журналистері елден кетіп, өздерінің YouTube арналарын ашты.
