ჯორჯია, რომელიც მნიშვნელოვანი შტატია, აშშ-ის საპრეზიდენტო არჩევნებში ხმების სრულად გადათვლას ჩაატარებს, იტყობინება CNBC სახელმწიფო მდივან ბრედ რაფენსპერგერზე დაყრდნობით.
მისი თქმით, ეს გადაწყვეტილება იმიტომ მიიღეს, რომ კანდიდატებს შორის სხვაობა მინიმალური იყო.
„ვინაიდან სხვაობა ძალიან მცირეა, საჭირო იქნება ხმების სრული ხელით გადათვლა ყველა ოლქში“, - თქვა რაფენსპერგერმა.
მან დასძინა, რომ ხმების ხელახალი დათვლა 20 ნოემბრისთვის დასრულდება.
Fox News-ის ცნობით, ჯორჯიაში ბიულეტენების 99% დამუშავებულია. დემოკრატი ჯო ბაიდენი მცირე უპირატესობით ლიდერობს, მიცემული ხმების 49.5%-ით. მოქმედ პრეზიდენტ დონალდ ტრამპს 49.2% აქვს.
ჯორჯიაში გამარჯვება კანდიდატს 16 საარჩევნო ხმას მისცემს.
