ჯანდაცვის მსოფლიო ორგანიზაცია მიიჩნევს, რომ მაიმუნის ყვავილი გარკვეულ პირობებში ადამიანებისთვის მაღალ საფრთხეს წარმოადგენს. თუმცა, ჯერ ნაადრევია ნერვიულობა, რადგან მისი გავრცელება ზომიერი რჩება.
კერძოდ, ჯანმო-ს 31 მაისს გამოქვეყნებული განცხადების თანახმად, მსოფლიოში ამ დაავადების მხოლოდ 257 დადასტურებული შემთხვევაა რეგისტრირებული, ხოლო 120 ადამიანი მაიმუნის ყვავილის სავარაუდო მატარებელია.
„საზოგადოებრივი ჯანმრთელობისთვის რისკი შეიძლება მაღალი იყოს, თუ ეს ვირუსი ისარგებლებს ადამიანის პათოგენად დამკვიდრების შესაძლებლობით და გავრცელდება მძიმე დაავადების მაღალი რისკის მქონე ჯგუფებზე, როგორიცაა მცირეწლოვანი ბავშვები და იმუნოკომპრომეტირებული პირები“, - განაცხადა ორგანიზაციამ.
აღსანიშნავია, რომ ეს დაავადება გადადის მხოლოდ ახლო კონტაქტით, ამიტომ მისი გავრცელების პრევენცია შესაძლებელია თვითიზოლაციითა და ჰიგიენის დაცვით. ჯერჯერობით, ცნობილია, რომ მაიმუნის ყვავილს, როგორც წესი, მსუბუქი მიმდინარეობა აქვს.
