ჩინეთმა გამოაცხადა კორონავირუსის ომიკრონული მუტაციის ახალი ქვევარიანტის აღმოჩენის შესახებ შანხაის მეტროპოლიაში, რომელიც გასული თვის დასაწყისში მკაცრი კარანტინიდან გამოვიდა. ახალ ომიკრონულ ქვევარიანტს უკვე BA 5.2.1 ეწოდა, იტყობინება Reuters.
ივნისის დასაწყისში შანხაიში მსოფლიოში ერთ-ერთი ყველაზე მკაცრი ლოქდაუნი მოიხსნა. ბევრ მაცხოვრებელს აეკრძალა ბინების დატოვება. თუმცა, ინფექციების რიცხვი იზრდება..
„ჩვენს ქალაქში ბოლო დროს COVID-19-ის დადებითი შემთხვევების დაფიქსირება კვლავ გრძელდება. ეპიდემიის საზოგადოებაში გავრცელების რისკი კვლავ ძალიან მაღალია“, - გააფრთხილა შანხაის მუნიციპალური ჯანდაცვის კომისიის დირექტორის მოადგილემ, ჟაო დანდანმა.
მისი თქმით, შანხაის რამდენიმე ძირითადი რაიონის მაცხოვრებლები 12-დან 14 ივლისამდე COVID-19-ზე ტესტირების ორ რაუნდს გაივლიან. ეს ხელს შეუწყობს ახალი აფეთქებების შესაძლებლობის კონტროლს.
ჩინეთის დაავადებათა პრევენციისა და კონტროლის ცენტრის ცნობით, ომიკრონის BA 5.2.1 ქვევარიანტი, რომელიც COVID-19-ის ახალი ტალღის მთავარი გამომწვევი მიზეზია, პირველად ჩინეთში 37 წლის მამაკაც პაციენტში აღმოაჩინეს, რომელიც შანხაიში უგანდიდან ჩავიდა.
კვლევამ აჩვენა, რომ ახალ ქვევარიანტს უფრო მაღალი გადაცემის მაჩვენებელი აქვს და იმუნური ანტისხეულების მიმართ უფრო მდგრადია. თუმცა, ვაქცინაცია კვლავ ეფექტურია BA.5-ით გამოწვეული სერიოზული გართულებების ან სიკვდილის პრევენციისთვის.
