ამის შესახებ აშშ-ის წარმომადგენელთა პალატის სპიკერის, ნენსი პელოსის ტაივანში ჩასვლის შემდეგ გახდა ცნობილი.
ჩინეთის სამხედრო ძალები ტაივანის ტერიტორიაზე 4-დან 7 აგვისტომდე სამხედრო წვრთნებს ჩაატარებენ.
ამის შესახებ სახელმწიფო საინფორმაციო სააგენტო „სინხუას“ მიერ გავრცელებულ განცხადებაშია ნათქვამი.
ვრცელდება ინფორმაცია, რომ ის ტაივანის მიმდებარე ექვს რეგიონში სამხედრო წვრთნებისა და სასწავლო აქტივობების ჩატარებას გეგმავს, მათ შორის ცეცხლსასროლი იარაღით წვრთნებს.
ნენსი პელოსის ტაიპეიში ჩასვლისთანავე, ჩინეთის საგარეო საქმეთა სამინისტრომ განაცხადა, რომ მისი ვიზიტი სერიოზულ გავლენას ახდენს ჩინეთ-აშშ-ს ურთიერთობების პოლიტიკურ საფუძვლებზე და მკაცრი პროტესტი გამოხატა შეერთებული შტატების მიმართ.
შეგახსენებთ, რომ აშშ-ის წარმომადგენელთა პალატის სპიკერი ნენსი პელოსი დღეს ტაივანს ეწვია. ეს მაღალი თანამდებობის ამერიკელი პოლიტიკოსის პირველი ვიზიტია ტაივანში ბოლო 25 წლის განმავლობაში.
ერთი დღით ადრე პეკინმა აშშ გააფრთხილა „საშინელი პოლიტიკური შედეგების“ შესახებ და დაემუქრა, რომ უმოქმედოდ არ იჯდებოდა, თუ მის „სუვერენიტეტსა და ტერიტორიულ მთლიანობას“ საფრთხე დაემუქრება.
პელოსის თვითმფრინავის მოსვლამდე ჩინეთმა ტაივანის მიმართულებით სუ-35 ტიპის გამანადგურებლები გაგზავნა. მედიის ცნობით, იაპონიის ბაზებიდან ერთდროულად აშშ-ის საჰაერო ძალების ათობით გამანადგურებელი აფრინდა.
