ბელგოროდის ოლქში ჩამოვარდნილი ილ-76 თვითმფრინავის ბორტჩამწერი აპარატების მონაცემებმა თვითმფრინავზე გარეგანი ზემოქმედება დაადასტურა.
„ტასი“ „შავი ყუთის“ მონაცემების გაშიფვრის შედეგებს რუსეთის უსაფრთხოების სამსახურებში საკუთარ წყაროზე დაყრდნობით ავრცელებს.
„შავი ყუთის მონაცემები გამორიცხავს Ил-76-ის ჩამოვარდნის ყველა შესაძლო ახსნას და ადასტურებს, რომ თვითმფრინავი გარე ზემოქმედების ქვეშ მოექცა, რაც იმას ნიშნავს, რომ ის ჰაერში ჩამოაგდეს“, - განაცხადა სააგენტოს წყარომ.
მონაცემთა ანალიზი ჯერ არ დასრულებულა; გამოცემის წყარო მიუთითებს, რომ გაშიფვრა დასასრულს უახლოვდება, მაგრამ „აჩქარება არ არის“.
შეგახსენებთ, რომ 24 იანვარს, ბელგოროდის ოლქის სოფელ იაბლონოვოდან რამდენიმე კილომეტრში რუსული სამხედრო-სატრანსპორტო თვითმფრინავი ილ-76 ჩამოვარდა. ბორტზე ეკიპაჟის ექვსი წევრი, სამხედრო პოლიციის თანამშრომელი და 60-ზე მეტი ტყვედ ჩავარდნილი უკრაინელი სამხედრო იმყოფებოდა. ყველა მათგანი დაიღუპა. რუსეთის თავდაცვის სამინისტრომ განაცხადა, რომ ილ-76 ხარკოვის ოლქიდან გაშვებული რაკეტებით ჩამოაგდეს.
რუსეთის საგამოძიებო კომიტეტმა ავიაკატასტროფაზე სისხლის სამართლის საქმე აღძრა, რომელიც ტერორისტულ აქტად იძიება (რუსეთის სისხლის სამართლის კოდექსის 205-ე მუხლი). უკრაინის უსაფრთხოების სამსახურმა ასევე აღძრა სისხლის სამართლის საქმე უკრაინელი სამხედრო ტყვეების გადაყვანის ილ-76-ის ჩამოვარდნასთან დაკავშირებით. გამოძიება ომის კანონებისა და წეს-ჩვეულებების დარღვევის მუხლით მიმდინარეობს.
