ოკუპირებულ ყირიმში არეულ-დარეული დღე იყო. სიმფეროპოლის ოლქის სოფელ გვარდეისკოეში სამხედრო ავიაბაზის თავზე დღეს შავი კვამლის ღრუბლები ავარდა. ადგილობრივი მაცხოვრებლების თქმით, სამხედრო ობიექტზე მანამდე რამდენიმე აფეთქების ხმა გაისმა.
რუსულ მედიაზე დაყრდნობით, უკრაინული გაზეთი „პრავდა“ იუწყება, რომ სამართალდამცავი ორგანოები მცირე ზომის უპილოტო საფრენი აპარატით თავდასხმის შესაძლებლობას იძიებენ. დღეს დილით, აფეთქებების ხმა გაისმა სოფელ მაისკოეში საბრძოლო მასალის საწყობშიც. ადგილობრივი მოსახლეობა ევაკუირებულია. რუსეთის თავდაცვის სამინისტრომ ინციდენტს დივერსიული აქტი უწოდა.
„ნიუ-იორკ თაიმსი“, უკრაინელი მაღალჩინოსნის ციტირებით, იუწყება, რომ მომხდარზე პასუხისმგებელია „მტრის ხაზების უკან მოქმედი ელიტური უკრაინული სამხედრო დანაყოფი“. ჩინოვნიკმა ინფორმაცია ანონიმურობის პირობით გაავრცელა.
ყირიმის სოფელ მაისკოეს მაცხოვრებლები ევაკუირებულნი იყვნენ სამხედრო ნაწილის კუთვნილ დროებით საბრძოლო მასალის საწყობში ხანძრისა და აფეთქებების შემდეგ. თვითმხილველები ძლიერი დარტყმების შესახებ იუწყებოდნენ და ხანძრის ამსახველ ვიდეოს აქვეყნებდნენ. შავი კვამლი სხვადასხვა წერტილიდან ჩანდა.
რუსეთის თავდაცვის სამინისტრომ აფეთქება დაადასტურა და დივერსიის აქტად შეაფასა. განცხადების თანახმად, დაზიანდა სამხედრო საწყობი და ასევე დაზიანდა რამდენიმე სამოქალაქო ობიექტი, მათ შორის ელექტროგადამცემი ხაზები, ელექტროსადგური, რკინიგზის ხაზი და რამდენიმე საცხოვრებელი შენობა.
ყირიმის ე.წ. გუბერნატორის თქმით, ორი ადამიანი დაშავდა, თუმცა მათ სიცოცხლეს საფრთხე არ ემუქრება. სამხედრო ნაწილიდან ხუთი კილომეტრის რადიუსში მცხოვრები მოსახლეობა ევაკუირებულია.
კიევის ხელისუფლებას დღევანდელ აფეთქებებთან დაკავშირებით განცხადება არ გაუკეთებია. გასულ კვირას ყირიმში რუსეთის სამხედრო ბაზაზე კიდევ ათი ძლიერი აფეთქება მოხდა. თავდაპირველად, მათი გამომწვევი მიზეზის შესახებ ინფორმაცია გაურკვეველი იყო, თუმცა მოგვიანებით თანამგზავრულმა სურათებმა აჩვენა, რომ ეს თავდასხმა იყო და არა უბედური შემთხვევა.
კიევმა მაშინ განაცხადა, რომ ინციდენტთან არაფერი საერთო არ ჰქონდა, კრემლმა კი წამოაყენა თეორია, რომ ხანძარსაწინააღმდეგო უსაფრთხოების რეგულაციები არ იყო დაცული.
