მარიუპოლში მდებარე აზოვსტალის ქარხნიდან უკრაინელი სამხედრო მოსამსახურეების გადამყვანი ავტობუსები გაემგზავრნენ.
„როიტერის“ ცნობით, შემთხვევის ადგილზე მყოფმა თვითმხილველმა განაცხადა, რომ აზოვსტალიდან უკრაინელი დამცველების გადამყვანი დაახლოებით 10 ავტობუსი გავიდა. ავტობუსების ზუსტი დანიშნულების ადგილი ჯერჯერობით უცნობია.
„ორშაბათს, „როიტერმა“ ათეულამდე ავტობუსი დაინახა, რომლებიც, როგორც ჩანს, უკრაინელ მებრძოლებს გადაჰყავდათ. ავტობუსებში რამდენი ადამიანი იმყოფებოდა, დადგენა შეუძლებელი იყო. სავარაუდოდ, საბჭოთა ეპოქის დიდი ქარხნის ადგილას დაახლოებით 600 მებრძოლი იმყოფება, მათ შორის ათობით დაჭრილი.“.
16 მაისს, რუსეთის თავდაცვის სამინისტრომ გამოაცხადა შეთანხმების შესახებ, რომლის მიხედვითაც მარიუპოლში ბლოკირებული აზოვსტალის ქარხნიდან დაჭრილი უკრაინელი ჯარისკაცები ოკუპირებულ ტერიტორიაზე გადაიყვანენ.
მოგვიანებით, აზოვის პოლკის მეთაურმა, დენის პროკოპენკომ, განაცხადა, რომ მათ დავალება შეასრულეს და სურდათ ხელქვეითების სიცოცხლის გადარჩენა.
