ვარშავაში უკრაინისა და პოლონეთის დელეგაციებმა ერთობლივი საბაჟო და სასაზღვრო კონტროლის განხორციელებასთან დაკავშირებით მოლაპარაკებების პირველი რაუნდი დაიწყეს.
ამის შესახებ უკრაინის ინფრასტრუქტურის სამინისტროს პრესსამსახურმა განაცხადა.
ასეთი შეთანხმება თავდაპირველად უნდა განსაზღვრავდეს ერთობლივი საკონტროლო პუნქტების ფუნქციონირების წესებს, საკონტროლო სამსახურებს შორის ინფორმაციის გაცვლას, არალეგალურ მიგრაციასთან ბრძოლის პრინციპებს და ერთობლივი პატრულირების ჩატარებას. პროექტი ასევე ითვალისწინებს ორი ქვეყნის საკონტროლო სამსახურების მიერ ერთმანეთისთვის ოფიციალური უფლებამოსილებებისა და ფუნქციების დელეგირების შესაძლებლობას.
ერთობლივი სასაზღვრო კონტროლი საერთაშორისო გადამზიდავებისა და ფიზიკური პირებისთვის საზღვრის გადაკვეთას გაამარტივებს და დააჩქარებს. შეთანხმების ხელმოწერის შემდეგ, უკრაინა გახდება ევროკავშირის არაწევრი ქვეყანა, რომელიც მსგავს სასაზღვრო გადასასვლელებს ევროკავშირის წევრ სახელმწიფოსთან იზიარებს.
მოლაპარაკებების პირველი რაუნდი, რომელიც ოთხშაბათს დაიწყო, ორ დღეს გაგრძელდება და დოკუმენტის საბაზისო ვერსიის შემუშავებით უნდა დაგვირგვინდეს.
ინფრასტრუქტურის სამინისტრომ აღნიშნა, რომ უკრაინასა და პოლონეთს შორის სავაჭრო ბრუნვამ 2022 წლის პირველი 10 თვის განმავლობაში 10.3 მილიარდ დოლარზე მეტი შეადგინა, ხოლო მთელი გასული წლის განმავლობაში თითქმის 10.2 მილიარდი დოლარი.
