რუსული ოპოზიციური ტელეარხი „დოჟდი“ (რომლის რედაქციაც არ უჭერს მხარს უკრაინაში ომს და რუსეთი დატოვა) წამყვან ალექსეი კოროსტელევთან დაკავშირებით დიდ სკანდალში აღმოჩნდა.
გადაცემა „აქ და ახლა“-ს ერთ-ერთ ეპიზოდში კოროსტელევმა შემდეგი განაცხადა:
„გამოგვიგზავნეთ შეტყობინებები [email protected] ან მოგვწერეთ ჩვენი Telegram ბოტის საშუალებით. <…> ვიმედოვნებთ, რომ შევძელით ბევრი სამხედრო მოსამსახურის დახმარება, მათ შორის ფრონტზე მყოფი აღჭურვილობითა და ძირითადი კეთილმოწყობითაც კი უზრუნველყოფილი პირების“.
ფრაზამ ლოგიკურად შექმნა შთაბეჭდილება, რომ „დოჟდი“ რუსეთის არმიას ეხმარებოდა. არხის მთავარმა რედაქტორმა, ტიხონ ძიაკომ, მაშინვე გააკეთა კომენტარი ამაზე. მან განაცხადა, რომ „დოჟდი“ „არც ფრონტზე და არც მის მიღმა ეხმარება და არც დაეხმარება რუსეთის არმიის აღჭურვაში“.
ძიაკომ ხაზგასმით აღნიშნა, რომ საფოსტო ყუთი, რომლის მისამართიც ეთერში გამოცხადდა, შეიქმნა „უკრაინაში რუსული არმიის დანაშაულებების, ასევე რუსეთის ფედერაციაში დანაშაულებრივი და უაზრო მობილიზაციის დროს დარღვევების შესახებ პირადი ჩვენებების შესაგროვებლად“.
მან ასევე დასძინა, რომ ეს ინფორმაცია უნდა გავრცელდეს, რადგან რუსეთის ხელმძღვანელობის ქმედებები დანაშაულებრივი ხასიათისაა.
ის ასევე დაეთანხმა, რომ ეთერში გამოყენებულმა ფრაზამ მაყურებელი შეცდომაში შეიყვანა. ამიტომ, ის ამოღებული იქნა ტრანსლაციის ჩანაწერიდან და გამეორებებიდან.
თუმცა, შემდგომში მედიასაშუალებებმა გაავრცელეს ინფორმაცია, რომ ლატვიის ეროვნული ელექტრონული მასმედიის საბჭომ გადაწყვიტა „დოჟდისთვის“ 10 000 ევროთი ჯარიმის დაკისრება. როგორც ამბობენ, ეს ჯარიმა ეხება არა მხოლოდ რუსეთის ფედერაციის არმიის „ჩვენიანად“ მოხსენიებას, არამედ რუსეთის რუკის გამოქვეყნებასაც, რომელზეც ოკუპირებული ყირიმია გამოსახული.
მედია საშუალებები ასევე იუწყებიან, რომ წამყვანის განცხადებების გამო ადმინისტრაციული წარმოება დაიწყო. თუ ექსპერტები მესამე დარღვევას დააფიქსირებენ, შესაძლოა, არხი „დოჟდი“ დაიხუროს.
ამ ინფორმაციის შემდეგ, „დოჟდის“ რედაქციამ კვლავ მოიხადა ბოდიში. არხმა ეთერში განაცხადა, რომ „დოჟდი“ წამყვან ალექსეი კოროსტელევთან პარტნიორობას წყვეტდა.
