ჩინური სტარტაპი Fourier Intelligence 2024 წლისთვის ათასობით GR-1 ჰუმანოიდი რობოტის გამოშვებას გეგმავს. კომპანიის დამფუძნებელი, ალექს გუ, თვლის, რომ მომავალში ასეთი მოწყობილობები ადამიანების ყოველდღიური ცხოვრების სრულფასოვან ნაწილად იქცევა.
„საუთ ჩინა მორნინგ პოსტთან“ საუბრისას გუმ განაცხადა, რომ „ფურიეს ინტელიჯენსი“ ჰუმანოიდი რობოტების მასობრივი წარმოების დაწყებას და „ათასობით ერთეულის“ მიწოდებას 2024 წლისთვის გეგმავს.
ჩინური კომპანია აპირებს, ყურადღება გაამახვილოს რობოტების „სხეულების“ შემადგენელი აპარატურის შემუშავებაზე, ანდროიდების „ტვინის“ შემუშავება კი ხელოვნური ინტელექტის შემქმნელებს მიანდოს. „ფურიეს“ თანადამფუძნებელმა და მთავარმა სტრატეგიის ოფიცერმა, ზენგმა, განაცხადა, რომ სტარტაპი LLM სფეროში მომუშავე რამდენიმე კომპანიასთან პოტენციური თანამშრომლობის შესახებ მოლაპარაკებებს აწარმოებს.
გუს თქმით, ჰუმანოიდი რობოტები შეიძლება გამოყენებულ იქნას ხანდაზმულთა მოვლის, განათლებისა და სტუმართმოყვარეობის ინდუსტრიაში. ბიზნესმენი თვლის, რომ ისინი მის კომპანიას მომდევნო სამიდან ხუთ წლამდე უფრო მეტ შემოსავალს მოუტანენ, ვიდრე ამჟამად ფურიეს მიერ წარმოებული რეაბილიტაციის რობოტები.
სტარტაპის ხელმძღვანელის თქმით, ჰუმანოიდი რობოტები შეიძლება ადამიანების ყოველდღიური ცხოვრების სრულფასოვან ნაწილად იქცნენ, თუმცა ამას დიდი დრო დასჭირდება.
„ნუ ელით სასწაულს ერთ წელიწადში, თუნდაც Tesla-სგან — ყველას მოგვიწევს ლოდინი [ჰუმანოიდი რობოტების მასობრივ წარმოებას]“, - თქვა გუმ. „თუმცა, ასევე, ნუ შეაფასებთ იმ შესაძლებლობას, რომ ეს ნივთი შეიძლება ადამიანების ყოველდღიური ცხოვრების ნაწილი გახდეს ხუთ ან ათ წელიწადში“.
გასულ წელს, Tesla-ს აღმასრულებელმა დირექტორმა ილონ მასკმა ელექტრომობილების მწარმოებლის ქარხნებში ჰუმანოიდი რობოტების მასობრივი წარმოების დაწყების ვადები გამოაცხადა. მილიარდერმა პირობა დადო, რომ Optimus-ის ანდროიდების წარმოება 2023 წლის ბოლოს დაიწყებოდა.
„Fourier Intelligence“ 2015 წელს დაარსდა და თავდაპირველად რეაბილიტაციის რობოტების შემუშავებაზე იყო ორიენტირებული. კომპანია მოწყობილობებს 10-ზე მეტი ქვეყნის სამედიცინო დაწესებულებებს აწვდის.
2023 წლის ივლისში სტარტაპმა წარმოადგინა GR-1 ჰუმანოიდი რობოტი: ანდროიდს შეუძლია ორ ფეხზე სიარული 5 კმ/სთ სიჩქარით და 50 კგ-მდე ტვირთის ტარება.