„კარლსბერგმა“ რუსეთი აქტივების მოპარვაში დაადანაშაულა და რუსეთის მთავრობასთან დადებული შეთანხმებიდან გავიდა.
დანიურმა ლუდსახარშმა „კარლსბერგმა“ რუსულ ბიზნესთან ყველანაირი კავშირი გაწყვიტა და უარს ამბობს რუსეთის მთავრობასთან შეთანხმების დადებაზე, რათა თავიდან აიცილოს რუსული აქტივების ჩამორთმევის ლეგიტიმაცია. ამის შესახებ კომპანიის ახალმა აღმასრულებელმა დირექტორმა, იაკობ აარუპ-ანდერსენმა, სამშაბათს განაცხადა, იუწყება CNN.
კომპანია გასული წლიდან ცდილობს რუსეთში შვილობილი კომპანიის, „ბალტიკას“ გაყიდვას, ისევე როგორც სხვა დასავლურმა კომპანიებმა გააკეთეს მას შემდეგ, რაც რუსეთი უკრაინაში შეჭრის შემდეგ ქვეყანა დატოვეს.
თუმცა, მას შემდეგ, რაც ივნისში „კარლსბერგმა“ განაცხადა, რომ მან რუსული ბიზნესისთვის მყიდველი იპოვა, მომდევნო თვეში რუსეთის პრეზიდენტმა ვლადიმერ პუტინმა გასცა ბრძანება „კარლსბერგის“ ადგილობრივი ლუდსახარშის წილის დროებით ჩამორთმევის შესახებ.
„ჩვენ არ შეგვიძლია არ ვაღიაროთ ის ფაქტი, რომ ჩვენი ბიზნესი რუსეთში მოიპარეს. და ჩვენ არ გვაქვს განზრახვა, ხელი შევუწყოთ მოპარული საქონლის ლეგიტიმაციას“, - განაცხადა აარუპ-ანდერსენმა.
მისი თქმით, ივლისიდან „ბალტიკას“ მენეჯმენტთან და რუსეთის ხელისუფლებასთან შეზღუდული კომუნიკაციის გამო, „კარლსბერგს“ არ შეუძლია არსებული სიტუაციიდან მისაღები გამოსავლის პოვნა.
„ჩვენ არ დავდებთ არანაირ შეთანხმებას რუსეთის მთავრობასთან, რომელიც რაიმე ფორმით გაამართლებს ჩვენი ბიზნესის უკანონო მიტაცებას“, - განაცხადა აღმასრულებელმა დირექტორმა.
ამ თვის დასაწყისში Carlsberg-მა რუსეთში თავისი ბრენდების ლიცენზირების ხელშეკრულებები შეწყვიტა, რაც Baltika-ს ქვეყანაში Carlsberg-ის ყველა პროდუქტის წარმოებისა და გაყიდვის საშუალებას აძლევდა.
„როდესაც ლიცენზიების ვადა ამოიწურება და გადასახადისგან გათავისუფლების პერიოდი დასრულდება, ისინი დაკარგავენ ჩვენი პროდუქციის წარმოების შესაძლებლობას. რა თქმა უნდა, ვერ ვიძლევი გარანტიას, რომ ეს მოხდება, მაგრამ ჩვენი მოლოდინი ასეთია“, - თქვა აარუპ-ანდერსენმა.
„კარლსბერგს“ რუსეთში რვა ლუდსახარში აქვს, სადაც დაახლოებით 8,400 ადამიანია დასაქმებული.
შეგახსენებთ, რომ 16 ივლისს პუტინმა გასცა ბრძანება, რუსეთში დანიური კომპანია Carlsberg-ისა და ფრანგული კომპანია Danone-ის აქტივები დროებით მმართველობაში გადასულიყო. Carlsberg-ის შვილობილ კომპანიას, Baltika-ს, ხელმძღვანელობდა ტაიმურაზ ბოლოევი, რომელიც 1990-იანი წლებიდან რუსეთის პრეზიდენტის მეგობარია. Danone Russia-ს ხელმძღვანელად ჩეჩნეთის ლიდერის, რამზან კადიროვის 32 წლის ძმისშვილი დაინიშნა.
წაიკითხეთ წყარო
